Франција ја испорача првата серија борбени авиони Мираж 2000-5 на Украина за да ја зајакне нејзината противвоздушна одбрана од Русија, објави во четвртокот францускиот министер за одбрана Себастиен Лекорну.
„Првите од овие авиони пристигнаа во Украина денес“, објави Лекорну на X, без да го прецизира бројот на испорачани авиони.
Тој додаде дека по неколкумесечна обука обезбедена од Франција, украинските пилоти ќе го користат леталото за да го одбранат својот воздушен простор.
Минатиот јуни, францускиот претседател Емануел Макрон го објави трансферот на авионите Мираж 2000-5 во Украина како дел од воената соработка на Франција со Киев.
Според буџетскиот извештај на француското национално собрание, шест од 26-те авиони Мираж 2000-5 во сопственост на француското воздухопловство биле наменети за Украина. Сепак, француското Министерство за одбрана ниту ја потврди ниту ја демантираше оваа бројка од безбедносни причини.
Украинските пилоти и механичари биле обучени во источна Франција, пишува францускиот дневен весник „Монд“.
Авионите, наводно, биле модифицирани за да се спротивстават на руската тактика за електронско војување.
Испораката доаѓа во време на обновени дискусии за потенцијално дипломатско решение за речиси тригодишната војна по враќањето на Доналд Трамп во Белата куќа и додека украинските сили се соочуваат со се поголеми предизвици на бојното поле.
