Околу 176.100 нерегуларни преминувања на границата се откриени на надворешните граници на ЕУ во првите седум месеци од 2023 година, што е за речиси 13 отсто повеќе од истиот период минатата година, објави граничната агенција на ЕУ.
Прелиминарните пресметки покажаа дека таа бројка е највисока за периодот јануари - јули од 2016 година, соопшти Фронтекс.
Зголемувањето се должи единствено на бројот на пристигнувања преку Централниот Медитеран, кој сè уште служи како примарна рута за миграција во ЕУ и сочинува над 50 отсто од сите откриени нерегуларни преминувања на границите на ЕУ, се вели во соопштението.
Според агенцијата, повеќе од двојно е зголемен бројот на неовластени премини на оваа рута.
„Зголемениот миграциски притисок на оваа рута може да продолжи и во наредните месеци, бидејќи шверцерите нудат пониски цени за мигрантите кои заминуваат од Либија и Тунис во услови на жестока конкуренција меѓу криминалните групи“, се предупредува во соопштението.
Напротив, бројот на пристигнувања за сите други миграциски рути е намален во однос на претходната година, почнувајќи од пад од 2 отсто на западномедитеранската рута до пад од 29 отсто на источномедитеранскиот пат.
