Израелскиот министер за одбрана Јоав Галант, по вториот бран експлозии низ Либан, изјави дека неговата земја „се фокусирала на либанскиот фронт и дека започнала нова фаза во војната“.
За време на посетата на аеродромот во близина на градот Хаифа во северен Израел, Галант рече: „Тежиштето се поместува на север. Ги придвижуваме нашите сили, ресурси и енергија на север. Мислам дека сме на почеток на нова фаза во војната. Мораме да се прилагодиме. Мораме да покажеме доследност со текот на времето. Оваа војна бара голема храброст, одлучност и упорност“.
Тврдејќи дека целта на израелскиот напад на север е да се осигура дека евакуираните израелски граѓани можат безбедно да се вратат дома, Галант тврди дека тие не ги заборавиле затворениците во Појасот Газа.
Во последните 24 часа низ цел Либан се случија експлозии, прво на пејџери, а денеска и на воки-токи.
Додека либанските власти сметаат дека Израел е одговорен за експлозиите, администрацијата на Тел Авив и понатаму молчи за ова прашање.
Но Си-Ен-Ен, повикувајќи се на три извори денеска објави дека израелските власти ги информирале САД дека ќе извршат операција во Либан во вторник, но без детали за планот.
Според извештаите, изворите биле информирани за разговорот меѓу американскиот министер за одбрана Лојд Остин и неговиот израелски колега Јоав Галант во вторникот наутро.
Неименуваните извори рекоа дека американските власти дознале за експлозиите на пејџер од медиумски извештаи по инцидентот.
Според Си-Ен-Ен, зад нападот во Либан во вторникот, во кој загинаа најмалку 12 лица, а речиси 3.000 беа ранети, стојат израелската разузнавачка служба Мосад и армијата.
САД, исто така, му пренесоа на Иран преку повратен канал дека не се вклучени во нападот и дека Иран не треба да ескалира, изјави американски претставник за Си-Ен-Ен.
Американскиот државен секретар Ентони Блинкен денеска во Каиро изјави дека САД „не знаеле за овие инциденти, ниту биле вмешани во нив“.
