Германскиот канцелар Олаф Шолц го отфрли тврдењето на Родерих Кизеветер, истакнат пратеник од Христијанско-демократската унија (ЦДУ), дека може да се сретне со рускиот претседател Владимир Путин пред федералните избори во Германија на 23 февруари.
„Тоа е лажно тврдење. Тоа е длабоко непристојно“, рече Шолц на настан на неговата Социјалдемократска партија (СПД) во Берлин, објави германски РНД.
Тој додаде дека нема „никаков доказ“ дека за таков состанок воопшто станало збор.
Претходно, Кизеветер во објава на платформата Х напиша дека „мора да се подготвиме за изненадување во изборната кампања. Се зголемуваат индикациите дека канцеларот Шолц ќе отпатува за Москва или ќе се сретне со Путин пред 23 февруари“.
Подоцна тој ја избриша објавата.
Истакнувајќи дека се разгледува правна постапка како одговор на постот на Кизеветер, владиниот портпарол Штефен Хебестрајт за РНД изјави дека тврдењето е „клевета“.
