Конвој со 500 трактори стигна до центарот на главниот град на Шпанија, Мадрид во средата наутро, а илјададруги го обиколија градот, додека протестите на фармерите продолжија во земјата.
Протестот во Мадрид го организира Унионс де Унионес, четвртиот по големина земјоделски синдикат во Шпанија, но кој не е во дијалог со Владата за нејзините барања.
Тензијата меѓу демонстрантите и властите беше голема, бидејќи фармерите одбиваат да се тргнат од Пуерта де Алкала додека полицијата не им дозволи влез на околу 1.500 трактори кои се обидуваат да стигнат до центарот на шпанскиот главен град.
Координаторот на синдикатот Франциско Мартин рече дека Владата во последен момент ја укинала дозволата за толку многу трактори и ги обвини властите за „она што може да се случи денес“ и „напнатоста во воздухот“, според шпанскиот дневен весник Ел Паис.
„Луѓето се навистина лути“, додаде тој.
Не само што некои фармери се подготвени да останат во центарот на Мадрид преку ноќ, рече тој, туку и „ќе се вратат во наредните денови“ доколку следниот понеделник не излезат конкретни мерки од Советот за земјоделство и рибарство на ЕУ.
Во меѓувреме, шпанскиот министер за земјоделство Луис Планас за медиумите изјави дека е сигурен дека протестите во Мадрид ќе продолжат „мирно и без каков било вид насилство“.
Надвор од Мадрид, исто така, се случуваат провинциски протести, како што се случуваат секој ден повеќе од две недели по ред.
Тракторите и земјоделците кои протестираат го блокираат сообраќајот и протестираат околу Куидад Реал, Мурсија и Сарагоса, според шпанскиот систем за следење на автопатиштата.
Минатата недела, по состанокот со трите најголеми шпански синдикати на земјоделци, кои исто така стојат зад многу од неодамнешните протести, шпанската влада објави неколку мерки за смирување на земјоделците.
Сепак, додека синдикатите ги оценуваат мерките, почнувајќи од посилни контроли на увозот до намалување на барањата за дигитално известување како позитивни, тие рекоа дека решенијата не одат доволно далеку.
Барањата на фармерите се насочени и кон Брисел и секоја од регионалните влади на Шпанија, со локални прашања како што се популацијата на волци, управувањето со водите и бавните бирократии.
Тие се противат и на најавениот договор за слободна трговија на ЕУ со јужноамериканскиот блок Меркосур. Земјоделците се жалат и дека цените на горивата и вештачките ѓубрива поскапеле по избувнувањето на војната во Украина пред две години. Шпанија е еден од најголемите европски производители на маслиново масло, портокали, лимони, вино и риба. Земјоделците ширум Европа со недели протестираат поради увозот на поевтина храна и регулативите на Европската унија, која воведе строги мерки за заштита на животната средина кои го поскапуваат производството. Во Шпанија дополнителен проблем е повеќемесечната суша.
