Премиерот на Грузија Иракли Кобахидзе во четвртокот најави дека земјата ќе ги одложи преговорите за пристапување во Европската унија (ЕУ) до 2028 година.
Кобахидзе од седиштето на партијата Грузиски сон во главниот град Тбилиси посочи дека Грузија е горда земја со богата историја и дека е неприфатливо ЕУ да ја смета нејзината интеграција како услуга.
Тој истакна дека Грузија ќе бара членство во ЕУ по свои услови, без да се потпира на добронамерноста на ЕУ.
Кобахидзе рече дека целта на земјата е да се приклучи на ЕУ до 2030 година, признавајќи дека процесот ќе биде тежок, но нагласи дека владата останува посветена на исполнувањето на оваа цел.
Тој, исто така, критикуваше некои европски политичари за мешање во внатрешните работи на Грузија, особено поради контроверзниот закон за странско влијание што доведе до застој во процесот на пристапување во ЕУ.
Тој посочи дека некои европски политичари користат приказни за членство во ЕУ и финансиска помош за да извршат притисок врз Грузија да ги исполни нивните барања.
Како одговор, Грузија одлучи да ги одложи сите преговори со ЕУ до 2028 година и дотогаш ќе одбие каква било финансиска помош од ЕУ.
Премиерот вети дека Грузија ќе продолжи да ги исполнува своите обврски од Договорот за слободна трговија со ЕУ без финансиска помош и планира 90 отсто од овие обврски да бидат исполнети до 2028 година. Тој нагласи дека Грузија ќе влезе во ЕУ со силна економија и демократски систем, без да моли за членство.
Европскиот парламент ги критикуваше резултатите од парламентарните избори во Грузија одржани на 26 октомври, наведувајќи сериозни нерегуларности. Пратениците побараа во рок од една година да се повторат изборите под меѓународен надзор.
Покрај тоа, Европскиот парламент повика на санкции против грузиските функционери, вклучително и Кобахидзе, кои беа прогласени за одговорни за поткопување на демократските стандарди. Парламентот, исто така, препорача ограничување на официјалните контакти со грузиската влада.
Грузија поднесе барање за членство во ЕУ во март 2022 година, а кандидатскиот статус го доби во декември 2023 година.
Процесот, сепак, беше прекинат во јули, по усвојувањето на законот за „транспарентност на странско влијание“, што предизвика значителни контроверзии.
Владејачката партија Грузиски сон победи на парламентарните избори во октомври со 53,93 отсто од гласовите, но опозициските партии заедно со претседателката Саломе Зурабишвили ја обвинија владата за изборна измама.
Зурабишвили поднесе барање до Уставниот суд за поништување на изборните резултати.
Кобахидзе ги оцени изборите како слободни и фер, обвинувајќи ја опозицијата дека се обидува да ја дестабилизира земјата.
