Полицијата во грузискиот главен град Тбилиси употреби солзавец и водени топови за да ги растера илјадниците проевропски демонстранти кои во понеделникот се обидоа да го опколат парламентот.
Немилите настани се случија за време на протестите ширум земјата предизвикани од одлуката на Владата на премиерот Иракли Кобахидзе на 28 ноември да ги прекине преговорите за пристапување во ЕУ до 2028 година.
Демонстрантите се собраа пред парламентот, користејќи огномети кои ги фрлаа кон полицајците. кои се засолнија зад барикадите.
Полицијата одговори со сила и ги растера демонстрантите. За време на конфликтот, неколку демонстранти беа приведени.
„Ова е напад врз слободата на изразување и правото на протест. Нарушени се основните права“, рече грузиската претседателка Саломе Зурабичвили, критикувајќи ја полициската интервенција.
МВР соопшти дека некои групи предизвикале насилство за време на демонстрациите.
Се додава дека од почетокот на протестот се повредени 113 полицајци
Тензиите во Грузија ескалираа по усвојувањето на контроверзниот закон за „Транспарентност на странско влијание“, за кој критичарите тврдат дека ги ограничува политичките слободи.
Законот предвидува дека организациите во Грузија, кои добиваат повеќе од 20 отсто од своите средства од странство, мора да бидат регистрирани како „организација што ги реализира интересите на странска сила“ или ќе се соочат со казни. При пријавувањето, сите приходи мора да бидат презентирани од институциите и организациите.
Организациите ќе имаат и обврска секоја година да пополнуваат финансиски извештаи.
Законот му дава овластување на Министерството за правда да го истражува, испитува и следи случајот во секое време.
Најавата на владата дека ги прекинува преговорите за пристап во ЕУ дојде неколку часа откако Европскиот парламент усвои резолуција во која се критикува гласањето од минатиот месец, кое тие го опишаа како „ниту слободно, ниту фер“.
ЕУ ѝ додели на Грузија кандидатски статус во декември 2023 година, под услов таа да ги исполни препораките на блокот, но го стави пристапот во мирување и ја намали финансиската поддршка на почетокот од оваа година по усвојувањето на законот за „странско влијание“ кој се смета за удар врз демократските слободи.
Претставниците на ЕУ повикаа на повторување на парламентарните избори во рок од една година под темелен меѓународен надзор и од независна изборна администрација. Тие, исто така, ја повикаа ЕУ да воведе санкции и да ги ограничи формалните контакти со Владата на Грузија.
Кобахидзе, исто така, рече дека Грузија ќе ги одбие сите буџетски грантови на ЕУ до крајот на 2028 година.
