Уставниот суд на Грузија во вторникот го отфрли барањето на претседателката Саломе Зурабичвили за поништување на резултатите од спорните парламентарни избори одржани во октомври оваа година.
Во пресудата, која беше донесена минатиот петок, но објавена на веб-страницата на судот во вторникот, се вели дека тужбата поднесена од Зурабичвили нема да биде прифатена за „суштинско разгледување“.
Судот отфрли уште една тужба поднесена од 30 опозициски пратеници против изборните резултати, според кои партијата Грузиски сон го освои мнозинството.
„Одлуката е конечна и не може да се обжали“, се додава во решението.
На 19 ноември, проевропската Зурабичвили поднесе тужба до судот за поништување на резултатите од изборите одржани на 26 октомври, на кои Грузискиот сон освои мнозинство во парламентот.
Претставниците на Грузискиот сон, вклучително и премиерот Иракли Кобахидзе и почесниот претседател на партијата Бидзин Иванишвили, ги поздравија резултатите.
Зурабичвили рече дека не ги признава резултатите поради наводната вмешаност на Русија.
Опозициските партии ги означија изборите како украдени, а имаше и протести кои се засилија откако Владата ги прекина преговорите за влез во Европската унија до 2028 година.
Протестите ширум земјата дојдоа по одлуката на премиерот Кобахидзе на 28 ноември да ги прекине преговорите за пристапување во ЕУ до 2028 година.
Тоа беше одговор на Владата на резолуција усвоена во Европскиот парламент во која се критикува гласањето од минатиот месец, кое тие го опишаа како „ниту слободно, ниту фер“.
Кобахидзе, исто така, рече дека Грузија ќе ги одбие сите буџетски грантови на ЕУ до крајот на 2028 година.
