Во врска со предлогот за резолуција усвоена денеска од Советот за безбедност на Обединетите нации и повикување на итен прекин на огнот во Појасот Газа, генералниот секретар на ОН, Антонио Гутереш рече дека спроведувањето на резолуцијата е императив и дека ако тоа не се стори би било непростливо.
„Советот за безбедност штотуку ја одобри долгоочекуваната нацрт-резолуција за Газа, која повикува на итен прекин на огнот и безусловно ослободување на сите заложници. Оваа резолуција мора да се спроведе, нејзиниот неуспех би бил непростлив“, рече Гутереш на социјалната мрежа Х.
Советот за безбедност на ОН усвои нацрт-резолуција со која се повикува на итен прекин на огнот за време на Рамазан, што би се претворило во траен и одржлив прекин на огнот во Појасот Газа.
Нацрт-резолуцијата ја подготвија привремените членки Алжир, Еквадор, Гвајана, Јапонија, Малта, Мозамбик, Јужна Кореја, Сиера Леоне, Словенија и Швајцарија и беше усвоена со 14 гласа „за“, а САД беа воздржани.
Поради воздржаноста на САД, израелскиот премиер Бенјамин Нетанјаху ја откажа најавената посета на одбрана делегација на Вашингтон, каде израелската страна требаше да ги сослуша предлозите на американската администрација за проширување на хуманитарната помош во Газа и за најавената офанзива во Рафах.
