Генералниот секретар на ОН, Антонио Гутереш, денес ја повика меѓународната заедница да ги зајакне своите механизми за заштита на човековите права во Сирија, по соборувањето на режимот на Башар ал Асад.
„Блискиот Исток е зафатен од многу пожари. Но, денес има пламен на надеж во Сирија. Тој пламен не смее да се изгасне. Народот на Сирија стои во момент од историјата - и момент на можност. Таа можност не може да биде пропуштена“, изјави Гутереш на прес-конференцијата во седиштето на ОН во Њујорк.
Опишувајќи го режимот на Асад како „децениско брутално, диктаторско владеење“, Гутереш изрази солидарност со народот на Сирија и рече:
„Ние признаваме дека овој момент ја нуди долго бараната шанса за сите Сиријци да ги остварат аспирациите што го поттикнаа нивното мирно движење за промените во 2011 година - и нивниот повик што одекна низ целата земја дека сирискиот народ е еден“.
Тој рече дека политичката транзиција треба да се „менаџира внимателно“ и предупреди за „реален ризик“ што може да се разоткрие.
„Политичката транзиција што претстои мора да биде од Сиријците и за Сиријците - сите Сиријци. Таа мора да биде инклузивна, веродостојна и мирна. Сите заедници мора целосно да се интегрираат во новата Сирија“, рече шефот на ОН.
Гутереш рече дека разговарал со голем број лидери од регионот и пошироко во врска со ситуацијата во Сирија.
Тој дополнително ја нагласи важноста од одредувањето на судбината на исчезнатите лица во Сирија и рече: „Генералното собрание ја создаде Независната институција за исчезнати лица во Сирија. Денеска го објавувам назначувањето на Карла Кинтана од Мексико за шеф на институцијата. На неа и на нејзиниот тим мора да им се дозволи целосно да го извршат нивниот мандат“.
„Сите меѓународни механизми за унапредување на заштитата на човековите права во Сирија и одговорноста за извршените злосторства – мора да го имаат она што им е потребно за да ја извршат својата витална работа“, рече тој.
Истакнувајќи ја континуираната закана од терористичката група ДЕАШ во Сирија, Гутереш ги осуди континуираните напади на Израел и рече: „Тие се кршење на суверенитетот и територијалниот интегритет на Сирија. Тие мора да престанат“.
Во врска со присуството на израелската Армија во областа на одвојување во тампон-зоната на Голанската Висорамнина во Сирија, тој рече: „Дозволете ми да бидам јасен: не треба да има воени сили во областа на одвојување, освен мировниците на ОН. Израел и Сирија мора да ги поддржат условите на Договорот за разделување на силите од 1974 година, кој останува целосно во сила“.
Истакнувајќи ја важноста на „суверенитетот, територијалното единство и интегритетот на Сирија“, Гутереш рече: „Ова е одлучувачки момент - момент на надеж и историја, но и момент на голема неизвесност“.
„Но, обврска на меѓународната заедница е да застане со народот на Сирија кој толку многу страдаше. Иднината на Сирија мора да биде обликувана од нејзиниот народ, за нејзиниот народ, со поддршка од сите нас“, додаде тој.
