Хамас денеска соопшти дека покажал „целосна подготвеност“ во напорите да се постигне договор за прекин на огнот со Израел во конфликтот во Појасот Газа.
Групата го обвини американскиот државен секретар Антони Блинкен дека сака да го ослободи од одговорност Израел од попречувањето на примирјето.
„Обидите на Блинкен да го ослободи Израел и да не го смета одговорен за попречувањето на примирјето се дел од соучесништвото на неговата земја во војната за уништување“, се вели во соопштението на Хамас доцна во средата.Во соопштението, палестинската група рече дека ги повикала САД, најголемиот сојузник на Израел, да изврши притисок врз Тел Авив да прифати договор што ќе доведе до траен прекин на огнот во енклавата.
Според Хамас, иако американски официјални лица рекоа дека Израел го прифатил предлогот за прекин на огнот претставен од претседателот Џо Бајден на 31 мај, „не сме слушнале дека некој израелски претставник го потврдил тоа“.
Американскиот државен секретар Ентони Блинкен претходно го обвини Хамас за застој во напорите за прекин на огнот и рече дека некои од наводните предложени промени се „изводливи, а некои не се“.
Еден ден претходно, Блинкен рече дека Нетанјаху ја „потврдил својата посветеност“ на предлогот за прекин на огнот во Газа за време на нивниот состанок во понеделникот вечерта.
Хамас ги негираше тврдењата дека групата изнела нови идеи за предлог за прекин на огнот во Газа и ја обвини американската администрација дека сака, заедно со нејзиниот близок сојузник Израел, да „избегне каква било посветеност“ на планот за траен прекин на огнот во Појасот Газа.
Во понеделникот, Советот за безбедност на ОН усвои резолуција за поддршка на предлогот за прекин на огнот во Газа, наведен од американскиот претседател Џо Бајден.
На 31 мај, Бајден рече дека Израел претставил трифазен договор со кој ќе се стави крај на непријателствата во Газа и ќе се обезбеди ослободување на заложниците кои се држат во крајбрежната енклава. Планот вклучува прекин на огнот, размена на заложници и затвореници и реконструкција на Газа.
Хамас рече дека се однесувал „позитивно“ и „одговорно“ со сите предлози за постигнување прекин на огнот во Газа и ослободување на сите затвореници.
„Израел продолжи да отфрла каков било траен прекин на огнот, во јасна спротивност со резолуцијата на Советот за безбедност на ОН и иницијативата на Бајден“, соопшти Хамас.
