Хантер Бајден, синот на американскиот претседател Џо Бајден, е прогласен за виновен од страна на поротата во сојузната американска држава Делавер за сите три кривични дела поврзани со неговото купување пиштол во 2018 година, додека бил зависен од наркотици.
На групата од 12 поротници и беа потребни околу три часа помеѓу понеделникот и вторникот за да го осудат Хантер Бајден за прекршување на федералниот закон пред шест години кога купил пиштол марка Колт Кобра со калибар 38 и не открил дека е зависник од наркотични дроги.
Првите две обвиненија беа поврзани со лажење за неговата зависност, додека третото беше поврзано со поседување пиштол додека тој бил зависник од дрога. На Бајден му се заканува затворска казна до 25 години и парична казна од вкупно 750.000 долари.
Малку е веројатно дека тој ќе добие некаде блиску до максималната казна бидејќи за Хантер Бајден ова е прв прекршок. Засега не е одреден датум на изрекување на пресудата.
Првата дама Џил Бајден, која присуствуваше на приближно еднонеделната постапка, пристигна во судот во вторникот набргу откако поротата ја изрече својата пресуда.
Претседателот рече дека нема да го помилува својот син, но не е јасно дали ќе му ја ублажи казната. Случајот отиде пред суд откако не се исполни договорот за признавање на вината за пиштолот и одделните даночни обвиненија.
Хантер Бајден беше обвинет за трите точки поврзани со оружје во септември минатата година. Другиот предмет за федерални даночни прекршоци ќе биде изведен пред суд во септември.