Најмалку 174 лица загинаа во нередите на фудбалски стадион во Индонезија, а полицијата интервенираше со солзавец за да го запре судирот помеѓу навивачите.
Повеќето жртви настрадаа во стампедото кога навивачите од домашната екипа на фудбалскиот клуб Арем и ривалот Персебаја Сурабаја се суддрија доцна синоќа откако домашната екипа е поразена со резултат 3:2.
Инцидентот се случи во градот Маланг во Источна Јава, а шефот на индонезиската полиција во провинцијата Источна Јава, Нико Афинта, рече дека уште 180 лица се повредени во нередите.
„Навивачите на ФК Арем упаднаа на теренот, а полицијата интервенираше со солзавец, што предизвика стампедо“, рече тој.
Министерот за спорт Заинудин Амали рече дека властите повторно ќе ја проценат безбедноста на фудбалските натпревари и ќе ја разгледаат можноста да не пуштаат гледачи на натпреварите по овој инцидент.
Снимките од стадионот споделени на социјалните мрежи прикажуваат навивачи, облечени во црвено и сино, како трчаат кон теренот и се судруваат со безбедносните сили. Афинта рече дека меѓу смртно страданите жртви има и полицајци.
Индонезискиот фудбалски сојуз (PSSI) ги откажа сите натпревари следната недела поради трагедијата и на фудбалскиот клуб Арем му забрани да биде домаќин на натпреварите до крајот на сезоната.
