Високиот командант на Иранската револуционерна гарда Фазлолах Нозари денеска ги демантираше тврдењата дека Иран ѝ испорачува на Русија ракети кои би можеле да се употребат во војната во Украина, јавуваат иранските медиуми.
Си-Ен-Ен и Волстрит журнал минатата недела објавија, повикувајќи се на неидентификувани извори, дека Иран префрлил балистички ракети со краток дострел во Русија.
Нозари рече дека не биле испратени проектили во Русија и дека таквото тврдење е „еден вид психолошка војна“, објави Ројтерс.
„Иран не поддржува ниту една страна во украинско-рускиот конфликт“, рече Нозари.
Запрашан за извештаите за ракетната одбрана на Иран до Русија, Кремљ рече дека Иран е партнер на Русија и дека двете земји водат дијалог во сите области.
Украина минатата недела објави дека продлабочувањето на воената соработка меѓу Техеран и Москва претставува закана за Украина, Европа и Блискиот Исток и ја повика меѓународната заедница да го зголеми притисокот врз Иран и Русија.
Секое иранско пренесување на балистички ракети во Русија би означило остра ескалација на војната во Украина, соопштија во петокот Соединетите држави.
Портпаролот на иранското Министерство за надворешни работи, пак, Насер Кенани изјави дека веруваат дека постојат дипломатски шанси за заживување на меѓународниот нуклеарен договор.
На неделната прес-конференција во Техеран, Кенани истакна дека Иран им дава приоритет на односите со соседите и со истокот, особено со Русија и Кина.
„Политиката на добри односи меѓу Иран и неговите соседи има сериозен и многу важен приоритет. Стратегијата за гледање кон исток не е тактички избор, туку стратешки избор. Овие односи се меѓу приоритетите на владата и дипломатскиот систем “, рече Кенани.
Запрашан за можноста за продолжување на нуклеарните преговори меѓу Иран и Западот, Кенани рече дека е жално што западните земји не дозволуваат спроведување на мултилатерален дипломатски пат.
Тој смета дека патот до договор може да остане отворен, под услов другата страна да покаже волја за заживување на нуклеарниот договор.
„Сè уште има дипломатска можност. Веруваме дека постои“, рече Кенани.
