Италија по Втората светска војна смени 67 влади и се досега ниту една жена не го водеше премиерскиот кабинет, за тоа да се промени со Џорџија Мелони лидерката на „Фратели ди Италија“ (ФДИ) и десничарската коалиција која победи на изборите.
Џорџија Мелони успеа да ја издигне ФДИ на националната сцена откако беше единствената партија која не ја поддржа Владата на национален спас на премиерот Марио Драги.
Израстена од самохрана мајка, во работничките предградија на Рим, и со кратка министерска функција, Мелони покажа метеорски раст во италијанската политика, поплочен со популизам, обединување на десниот блок, но и искористување на приликата кога гласачите се разочарани од левицата која е дезорганизирана и очекуваат некое ново лице да се справи со наталожените кризи.
„Ова е време на одговорност, кога ако сакате да бидете дел од историјата морате да разберете каква е вашата одговорност кон милиони луѓе бидејќи Италија не одбра нас и ние нема да ја предадеме“, порача Мелони во првото обраќање по неделната победа.
Од што се состои платформата на Мелони?
Нејзината платформа се базира на проверени десничарски идеи, иако таа тврди дека партијата се дистанцирала од неофашистичките корени во минатото и дека ќе се залага за модерен конзервативизам.
Но, многумина не, само во Италија, туку и пошироко се прашуваат какви ќе бидат политиките на Мелони и дали под нејзино водство Италија ќе биде новата „проблематична“ членка на ЕУ.
Мелони за да ја води новата италијанска влада ќе треба да добие поддршка од коалиционите партнери „Форца Италија“ од поранешниот премиер и милијардер Силвио Берлускони и „Лига“ предводена од Матео Салвини.
Иако и двајцата речиси и да исчезнаа од политичкиот мејнстрим во Италија, сепак имаат голема одлучувачка моќ во идните политики, бидејќи со собраните гласови коалицијата ќе достигне околу 45% од гласовите според првичните проценки на изборната комисија и ќе има убедливо мнозинство во дводомниот Парламент на Италија.
Џорџија Мелони ќе треба да прифати дел од популистичките идеи на коалиционите партнери, но самата тврди дека не поддржува излез на Италија од Европската Унија и НАТО.
Јавно во кампањата посочи дека треба да се поддржи Украина со оружје, и дека нема да го загрози доделувањето на европска помош вредна 200 милијарди евра со потези кои ќе го испровоцираат Брисел.
Модерен конзервативизам при економска криза
Идната премиерка на Италија секогаш се декларира како христијанка и мајка која ги почитува семејните вредности, но иако е против не би го забранила абортусот како право на жената.
Антимигрантската политика и е една од препознатливите заложби, со барања италијанската морнарица да ги пресретнува бродовите со мигранти кои се упатуваат кон бреговите и да ги блокира целосно.
Гласачите кои во помал број излегоа отколку во 2018 година најмногу се загрижени за галопирачкиот раст на цените, засилувањето на енергетската криза и влошената економска состојба. Затоа ќе очекуваат помалку идеологија, а повеќе практични решенија и подобрување на економијата.
