Во првите анкети спроведени по повлекувањето на американскиот претседател Џо Бајден од изборната трка, потпретседателката Камала Харис минимално води на анкети пред поранешниот претседател Доналд Трамп.
Истражувањето на Ројтерс/Ипсос покажува дека Харис води пред Трамп со 44% спрема 42%, со маргина на грешка од 3%, објави бизнис магазинот Форбс.
Кога во трката е вклучен и независниот кандидат Роберт Ф. Кенеди Помладиот, водството на Харис се протега на 42%-38%.
Оваа промена следи по период на тесни анкети, при што претходните истражувања покажаа дека Трамп или тесно води или е изедначен со Харис.
Претходната анкета спроведена од Ројтерс/Ипсос на 15-16 јули покажа дека двајцата кандидати се изедначени со 44%.
Јавната перцепција за менталната острина на Харис е особено позитивна, со 56% од гласачите кои ја потврдуваат нејзината способност да се справи со предизвиците, во споредба со 49% за Трамп и само 22% за Бајден.
Овој контраст ја нагласува една од причините за неодамнешниот пораст на популарноста на Харис, оценува Форбс.
Тони Фабрицио, анкетарот на изборниот штаб на Трамп, предвидува привремено зголемување на рејтингот на Харис, нарекувајќи го овој период „Меден месец за кандидатката“.
Бајден излезе од трката по зголемениот внатрепартиски притисок, по слабите перформанси во првата претседателска дебата, но и засилени сомнежи дека повеќе не може да го победи Трамп и дека нема сила за енергични и прецизни јавни настапи.
Бајден ја поддржа Харис, а тој потег брзо доби широка поддршка од демократските челници и практично и ја обезбеди номинацијата.
