Кина силно ја критикуваше посетата на јапонските пратеници на Тајван, порачувајќи му на Токио дека Тајван е црвена линија за Пекинг што не може да се помине, објавија во четвртокот државните медиуми.
Портпаролот на кинеското Министерство за надворешни работи Лин Џијан изјави дека постои само една Кина и дека Тајван е нераскинлив дел од кинеската територија.
„Ние цврсто се спротивставуваме на каква било форма на официјална интеракција меѓу регионот на Тајван и земјите кои имаат дипломатски врски со Кина и вложивме сериозни протести до јапонската страна“, рече Лин.
Неговата реакција уследи по извештаите дека член на Претставничкиот дом на Јапонија, поранешен генерален секретар на владејачката Либерално-демократска партија (ЛДП), го посетил самоуправниот остров заедно со други јапонски парламентарци и се сретнал со неговиот лидер Лаи Чинг-те и други функционери.
„Јапонија изврши безброј злосторства во текот на своето 50-годишно колонијално владеење над Тајван и е одговорна за огромните гревови кои историјата ги сведочи против кинескиот народ“, рече Лин, повикувајќи ја Јапонија да се придржува до принципот на една Кина и духот на четири политички документи меѓу двете земји.
Кинеската крајбрежна стража во четвртокот објави дека избркала јапонски брод што преминал во кинеските територијални води во близина на островите Диаоју.
Крајбрежната стража го повика Токио веднаш да ги прекине сите нелегални активности во овие води.
„Бродовите ЦЦГ ќе продолжат со заштита на поморското право и активности за спроведување на законот во нашите јурисдикциски води за да го заштитат националниот суверенитет, безбедноста и поморските права“, објави државниот Глобал Тајмс.
