Рускиот министер за надворешни работи Сергеј Лавров изјави дека не е можно да се обезбеди безбедност на Блискиот Исток без формирање на палестинска држава и дека тоа го спречуваат Соединетите Американски Држави и Израел.
Лавров зборуваше на прес-конференција по состанокот на министрите за надворешни работи на Шангајската организација за соработка што се одржа во Астана, главниот град на Казахстан.
Наведувајќи дека на министерскиот состанок се разговарало за ситуацијата на Блискиот Исток, Лавров ја истакнал важноста од создавање палестинска држава.
„Дојдовме до заедничко мислење дека не е можно да се обезбеди безбедност во овој регион на Евроазија без формирање на палестинска држава. И Израел и САД, кои го поддржуваат Израел, се обидуваат на секој начин да го спречат овој процес“, кажа Лавров.
Во врска со политиката на Западот кон Евроазија, Лавров рече:
„Западот, предводен од САД, се обидува да ја преземе контролата врз цела Евроазија. Претставниците на НАТО и на Европската унија се обидуваат да ги интегрираат своите структури во Азија и да ги потчинат земјите од регионот“.
Зборувајќи за мировната конференција за Украина, која ќе се одржи на 15 и 16 јуни, а домаќин ќе биде Швајцарија, Лавров изјави дека оваа конференција е организирана заради мировната формула на ултиматумот на украинскиот претседател Володимир Зеленски и рече:
„Западот сака да ѝ постави ултиматум на Руската Федерација. Апсурдни се напорите да се привлечат земји на конференција за Украина“.
