Лидерите на Велика Британија и Франција треба да го посетат Вашингтон следната недела и да разговараат со американскиот престедател Доналд Трамп за руско-украинската војна.
Посетата на Макрон доаѓа додека администрацијата на Трамп се вклучи во директни преговори со Русија, потег што предизвика загриженост кај европските сојузници.
„Тој ќе дојде да го претставува гласот на Европејците и да тврди дека иднината на Украина не може да се реши без нив“, изјави францускиот министер за европски прашања Бенџамин Хадад.
Претстојниот состанок следи по претходната средба меѓу Макрон и Трамп во декември во Елисејската палата, каде што одржаа трилатерална дискусија со украинскиот претседател Володимир Зеленски.
Војната во Украина се очекува да биде клучен фокус на разговорите во Вашингтон, особено бидејќи САД иницираа директен дипломатски ангажман со Москва.
Во вторникот, американскиот државен секретар Марко Рубио се состана со рускиот министер за надворешни работи Сергеј Лавров во Саудиска Арабија, каде, наводно, се согласиле да одржат дополнителни преговори за Украина без учество на Киев или европски држави.
Британскиот премиер Кир Стармер, исто така, треба да ја посети Белата куќа следната недела, според американскиот советник за национална безбедност Мајк Волц, кој го потврди патувањето за време на интервјуто за Фокс њуз.
Состаноците, организирани од администрацијата на Трамп, имаат за цел да посредуваат за решавање на тековниот конфликт во Украина.
