Најголемата воздушна вежба на НАТО, која ќе се одржи во Европа следната недела, ќе го покаже единството, силата и подготвеноста на Алијансата, соопштија американските официјални лица.
„Ова е вежба која ќе биде сигурно импресивна за секого“, рече американската амбасадорка во Германија Еми Гутман на прес-конференцијата во Берлин
„Би бил прилично изненаден доколку некој светски лидер не забележи што покажува ова во однос на духот на овој воен сојуз“, рече Гутман.
Таа истакна дека Соединетите Американски Држави (САД) испратиле над 100 авиони и 2.000 воени лица во Европа за учество на воената вежба што ќе се одржи од 12 до 23 јуни.
„Air Defender 2023“ е најголемата вежба за распоредување на сојузничките воздухопловни сили во Европа, во историјата на НАТО. Таа без никакво сомневање ќе ја покаже агилноста и брзината на нашите сојузнички сили во НАТО“, рече Гутман.
На воената вежба ќе учествуваат околу 10.000 војници од 25 земји членки на НАТО, кои ќе вежбаат одбранбени маневри во германскиот и европскиот воздушен простор.
