Унгарскиот премиер Виктор Орбан ја критикуваше Европската унија, нарекувајќи ја „болна“ поради, како што рече, нејзините неуспеси да ги одржи мирот, безбедноста и просперитетот.
Орбан изјави дека ЕУ не успева да ги реши клучните проблеми.
„Европската унија не може да гарантира мир и безбедност, не обезбедува просперитет и не се бори со илегалната миграција. Овие симптоми ја разболуваат“, рече унгарскиот премиер.
На конференцијата „Унгарско претседателство со ЕУ2024, успешна приказна“ во замокот Буда во Будимпешта, Орбан се осврна на унгарското претседателство со Советот на Европската унија, кое заврши на крајот на декември.
Тој ги поврза неуспесите на ЕУ со, како што рече, лицемерието и доминацијата на олигархијата со седиште во Брисел.
„Брисел стана прогресивно-либерален блок на моќ, одвоен од европските граѓани и непријателски настроен кон националниот суверенитет“, рече Орбан.
Тој нагласи дека унгарската политика е фундаментално различна од траекторијата на ЕУ.
„Водена од националните интереси и посветеноста на суверенитетот, Унгарија се фокусираше на зајакнување на семејните политики, намалување на трошоците за енергија и модернизација на својата економија“.
Тој смета дека „втората фаза од борбата за иднината на Европа започнува сега“.
Унгарија го презеде претседавањето со Советот на ЕУ од Белгија во средината на 2024 година, а од 1 јануари годинава таа улога ја презеде Полска.
