Унгарскиот премиер Виктор Орбан во своето обраќање пред Европскиот парламент денес ги истакна миграцијата, конкурентноста и демографските предизвици како клучни прашања со кои се соочува Европската Унија.
Европската унија мора да се промени и дека унгарското претседателство со ЕУ има за цел да биде „гласот и катализаторот на промените“.
„Најважно е дека ЕУ мора да се промени. Унгарското претседателство сака да биде гласот на промените и нејзиниот катализатор. Одлуките мора да ги носат земјите-членки на ЕУ и нивните институции, а не унгарското претседателство“, рече Орбан.
Според него, работата на Унгарија е да укаже на проблемите и да изнесува предлози во интерес на мирот, безбедноста и просперитетот на ЕУ.
Во своето обраќање пред Европскиот парламент во Стразбур, каде што ја презентираше унгарската програма, Орбан рече дека конкурентноста е најважниот елемент на промената.
Тој наведе дека „во изминатите две децении економскиот раст во Европа беше значително побавен отколку во Кина и Соединетите Американски Држави“.
Орбан истакна дека продуктивноста на ЕУ расте побавно од конкуренцијата, што доведува до намалување на учеството на ЕУ во глобалната трговија.
Зголемувањето на трошоците за енергија тој му го припиша на намалувањето на увозот од Русија и тековната зелена трансформација што ја поврза со овие предизвици.
„Бизнисите плаќаат два до три пати повеќе за струја отколку во САД, а цените на бензинот се четири до пет пати повисоки“, додаде Орбан.
Тој оцени дека Европската Унија изгубила значителен раст на БДП со откажувањето од рускиот гас, а во меѓувреме, како што наведе, се пренасочиле значителни финансиски средства за субвенции за енергија и изградба на инфраструктура неопходна за увоз на течен гас.
„Половина од европските компании сметаат дека цената на енергијата е главната пречка за инвестиции. Во случајот со индустриите кои интензивно користат енергија, а кои се важни за економијата на Унијата, производството е намалено за 10-15 проценти“, рече Орбан.
Тој нагласи дека ЕУ заостанува зад САД во трошоците за истражување и развој, што придонесува за економскиот пад на ЕУ.
„Тоа се многу сериозни предизвици и сериозни проблеми. Сепак, на почетокот на институционалниот циклус сакам да појаснам дека земјите членки чекаат многу брза акција од страна на институциите на ЕУ“, нагласи тој.
Тој продолжи: „Ние и земјите членки сакаме да видиме намалување на административниот товар. Сакаме да видиме помалку регулатива, енергетска безбедност, зелена индустриска политика, зајакнување на единствениот пазар. Исто така, сакаме да видиме и проширување на трговската политика. Наместо да формираме блокови, треба да имаме повеќе меѓусебно поврзување.“
Говорејќи за миграцијата, Орбан рече дека сегашната рамка за миграција внатре во ЕУ не успева да го запре протокот на нерегуларни мигранти и дека е потребен преглед, заедно со напорите за подобрување на надворешната заштита на границите на ЕУ.
„Мислам дека сега е време да се справиме со тоа на највисоко политичко ниво и дали можеме да го вратиме правилното функционирање со политичка волја за да обезбедиме правилно функционирање на Шенген зоната“, рече тој.
Орбан се заложи и за „урамнотежена политика на проширување заснована врз заслуги“ и забрзување на пристапниот процес на земјите од Западен Балкан, особено на Србија.
