Унгарскиот премиер Виктор Орбан денеска изјави дека полската влада предводена од премиерот Доналд Туск била инсталирана од Европската унија како дел од заговорот за замена на претходното десничарско популистичко раководство на таа земја и дека истото сценарио сега се одвива и во случајот со Унгарија.
Орбан не претстави никаков доказ за да ги поткрепи неговите тврдења за полската влада, која беше избрана во 2023 година со рекордно висок одѕив на гласачите од речиси 74 отсто.
Тој зборуваше за полската влада два дена откако рече дека ЕУ се обидува да ја собори неговата влада и да воспостави марионетски режим во Унгарија.
Говорејќи денеска на државното радио, Орбан ја нападна претседателката на Европската комисија Урсула фон дер Лајен и лидерот на најголемата политичка групација во ЕУ, претседателот на Европската народна партија Манфред Вебер, тврдејќи дека сакаат да ја сменат неговата влада.
„Тоа не е ни таен заговор против Унгарија, тоа е отворено претставен и објавен план“, рече Орбан за наводниот заговор против него, за кој не даде докази.
Тој рече дека „истото се случило и во Полска“. Орбан изјави дека Фон дер Лајен и Вебер „дале се од себе и отворено најавија дека конзервативната полска влада треба да оди и да биде заменета со нова“.
„Вака нашиот пријател Туск стана премиер во Полска. Истото сценарио сега се одвива и во случајот со Унгарија“, рече Орбан.
Унгарскиот премиер, кој ќе се соочи со избори на почетокот на 2026 година, ја спореди ЕУ со поранешниот Советски Сојуз. „
Тие ќе работат на тоа. Ним им треба марионетска влада. Да бидеме искрени - секоја империја е таква. Советите беа такви, нели“, заклучи Орбан.
Портпаролот на полското Министерство за надворешни работи, Павел Вронски, како одговор на прашањата на агенцијата АП во врска со ова, рече дека „во Полска се одржаа слободни парламентарни избори на 15 октомври 2023 година“ и дека актуелната влада е избрана врз основа на волјата на полските гласачи.
