Претседателката на Косово Вјоса Османи-Садриу денеска во Брисел, во пресрет на самитот ЕУ-Западен Балкан, изјави дека Косово има информации за плановите на Србија за нови напади на Косово.
Османи рече дека ќе ги информира европските лидери за информациите што Косово ги има собрано со своите партнери во врска со овие планови на Србија.
Таа посочи дека е неопходно да се преземат превентивни мерки за да се спречи дестабилизација на регионот од можни напади од Србија.
„Денеска ќе ги информирам сите европски лидери за информациите што нашите безбедносни институции заедно со нашите партнери ги собраа во врска со ова, бидејќи тоа се аларми кои сите мораме да ги сфатиме многу сериозно и да дејствуваме превентивно за Србија повеќе да не го дестабилизира нашиот регион“, нагласи Османи.
Косовската претседателка истакна дека времето во кое се одржува самитот е тешко за Европа и за светот воопшто, поради глобалните конфликти.
Сепак, таа додаде дека самитот ја докажува важноста на мирот на Западен Балкан.
„За жал, Србија сè уште ја водат луѓе кои сакаат да го вратат нашиот регион во 90-те. Не смееме да дозволиме ваква логика да триумфира, затоа работиме со нашите партнери во ЕУ да ја зголемиме безбедноста на Косово и особено на безбедносниот аспект околу границата со Србија“, рече Османи.
Таа зборуваше и за нацрт-статутот на Заедницата на општините со српско мнозинство, кој на 21 октомври на Косово му беше доставен од европски и американски емисари.
Османи рече дека Заедницата на општините со српско мнозинство секако ќе го спроведе, доколку нацрт-статутот е во согласност со Уставот, што ќе го провери и Уставниот суд на Косово.
