Полската заменик-министерка за европски прашања Магдалена Собковјак-Чарнецка денеска изјави дека унгарскиот премиер Виктор Орбан не бил поканет на церемонијата што се одржува во Варшава по повод полското претседавање со Советот на ЕУ. На церемонијата не е добродојден ниту унгарскиот амбасадор во таа земја.
Како што истакна Собковјак-Чарнецка, полските власти ја донесле таа одлука откако Будимпешта му даде азил на поранешниот заменик-министер за правда на Полска, Марсил Романовски, кој е под истрага за наводна злоупотреба на јавни средства.
Будимпешта му даде политички азил на Романовски, кој беше уапсен во Полска во јули минатата година, како дел од истрагата за злоупотреба на јавни средства, што беше остро критикувано од официјални лица во Варшава.
Романовски претходно ги негираше обвиненијата, а доби азил во Унгарија откако беше ослободен во Полска поради пратенички имунитет.
Собковјак-Чарнечка рече и дека чека да види дали на церемонијата што се одржува во Големиот театар-Национална опера во Варшава ќе се појави претставник на унгарската амбасада од понизок ранг.
Таа посочи дека кога беа испратени поканите минатиот месец, беа поканети сите највисоки функционери на ЕУ, но полскиот министер за надворешни работи Радислав Шикорски реши да не ги поканува унгарските лидери по инцидентот со Романовски.
Полскиот премиер Доналд Туск претходно го критикуваше ставот на Орбан за Украина, додека Орбан рече дека владата на Туск ги гледа Унгарците како „непријатели“.
Полска го презеде претседавањето со ЕУ од Унгаријана 1 јануари.
