Европските лидери го поздравија изборот на поранешниот португалски премиер Антонио Коста за нов претседател на Европскиот совет.
Досегашниот претседател на Европскиот совет, Шарл Мишел, претходно објави дека поранешниот португалски премиер Антонио Коста е избран да го замени.
Тој ја најави и кандидатурата на Урсула фон дер Лајен за втор петгодишен мандат како претседателка на Европската комисија и кандидатурата на естонската премиерка Каја Калас, која ќе го замени Жозеп Борел на местото шеф на надворешна политика.
Калас изрази благодарност за номинацијата на социјалната мрежа Х.
„Мора да продолжиме да работиме заедно за да се осигуриме дека Европа е ефикасен глобален партнер што ќе ги одржува нашите граѓани слободни, безбедни и просперитетни“, наведе Калас.
Германскиот канцелар Олаф Шолц им честита во објава на Х.
„Важен сигнал. Со нив може да направиме добар и брз напредок“, порача Шолц.
Белгискиот премиер Александар де Кро рече дека ги очекува голем предизвик и им посака сила и храброст во времињата на искушение за Европската Унија (ЕУ).
Шведскиот премиер Улф Кристерсон ја пофали Калас за нејзините „беспрекорни резултати“, истакнувајќи дека таа „ќе им донесе солидно искуство во неколку области, меѓу кои и непоколебливата поддршка на ЕУ за Украина“.
Калас и Фон дер Лајен чекаат одобрение од Европскиот парламент за преземање на должноста.
