Најмалку 25 лица загинаа во катастрофалните пожари што беснеат во американската сојузна држава Калифорнија, а метеоролозите предупредуваат дека силните ветрови што се очекуваат наредните денови ќе ја влошат состојбата, соопштија официјални лица вчера, јавува Анадолу.
Двата активни пожара, во областите Итон и Палисејдс, веќе изгореа над 40.000 акри земјиште, уништувајќи повеќе од 12.300 дома, бизниси, храмови и училишта.
Пожарникарите продолжуваат да се борат со огнената стихија, но се соочуваат со предизвици бидејќи метеоролозите најавуваат нови силни ветрови, познати како Санта Ана, со брзина од 72 до 104 километри на час.
Националната метеоролошка служба во Лос Анџелес извести дека добрата вест е дека временските услови ќе се подобрат, но лошата вест е што следната недела се уште се очекуваат силни налети на ветер, што може да ја влоши ситуацијата во некои области.
Сè уште не е утврдена причината за пожарите, но властите не ја исклучуваат можноста за подметнување.
Дополнително, калифорнискиот Оддел за шумарство и заштита од пожари испитува дали електричните далноводи можеби го предизвикале пожарот Итон, во кој загинаа 16 лица. Според последните податоци, пожарот Итон е 45 отсто под контрола, а пожарот Палисејдс е само 21 отсто контролиран.
Економски најпогубна катастрофа во историјата на САД
Прелиминарните процени на штетите од пожарите се десетици милијарди долари, изјави американскиот претседател Џо Бајден, а некои оценки достигнуваат и до 50 милијарди долари.
„Тоа се сериозни процени бидејќи ја гледате објективната пазарна вредност на погодените објекти, но засега го нема одговорот“, рече гувернерот на Калифорнија, Гавин Њусом.
„Десетици милијарди. Претседателот Бајден има право, тоа е процената.“
Њусом објави дека од федералната Влада побарал 2,5 милијарди долари како почетна помош за расчистување и обновување. Во меѓувреме, гувернерот имаше состанок со претставници на осигурителните компании, со цел да се забрза и олесни процесот на компензација за погодените семејства.
„Само што се сретнав со над 40 лидери од осигурителната индустрија, извршни директори и претседатели. Имавме искрен разговор за транспарентен и одговорен процес“, истакна Њусом. „Ќе се погрижиме луѓето да ги добијат своите средства колку што е можно побрзо.“
Технолошките компании Гугл и Јутјуб објавија донации од вкупно 15 милиони долари за помош и обнова.
„Лос Анџелес е срцето на забавната индустрија и има глобално влијание врз културата. Тоа е дом на многу наши вработени и партнери“, изјави Нил Мохан, извршен директор на Јутјуб.
„Со скршени срца ја следиме оваа трагедија и сакаме да придонесеме за заедницата што се обновува.“
Компанијата Дизни донираше 15 милиони долари и го отвори својот магацин со гардероба за вработените и нивните семејства што ги загубија своите домови.
„Сакаме на семејствата да им нагласиме: ‘Веќе сè е организирано за вас кога ќе дојдете тука. Може да земете сè што ви е потребно’“, изјави Хајди Чонг, потпретседателка на продукциски услуги на Дизни.
Меѓу познатите личности што донираа помош се Леонардо ДиКаприо, Ева Лонгорија и Џејми Ли Кертис, секој по еден милион долари. Фондацијата на Бијонсе донираше 2,5 милиони долари.
