Министерството за надворешни работи на Русија синоќа соопшти дека Самитот на НАТО во Вилнус, Литванија, го означил враќањето на Алијансата кон размислувањата и шемите од времето на Студената војна.
Во соопштението на својата веб-страница, Министерството наведува дека Западот ги штити интересите на една милијарда жители на западните земји и се бори за својата хегемонија, обидувајќи се да го спречи формирањето на мултиполарен свет, вклучително и со воени средства.
„За Западот, поредокот заснован врз правила е узурпирана привилегија за кршење на меѓународното право. Исходот од акциите на НАТО е добро познат, проширувањето на жариштата за нестабилност, уништувањето држави, див тероризам, неказнети воени злосторства, крв на цивили, вклучително и деца, бескрајни бранови бегалци“, се наведува во соопштението од Москва.
Москва соопшти дека Украина станала лидер во борбата на НАТО против Русија и дека ѝ е ветено членство и оружје со долг дострел.
Исто така, се наведува дека Грузија, Босна и Херцеговина и Молдавија се следните во редот за влез во НАТО, дека Финска и Шведска брзаат и дека Арктикот се милитаризира.
„Блискиот Исток и Африка се прогласени за зона на стратегиски интереси во која Вашингтон и неговите сојузници се обидуваат да наметнат свои наредби и да ги искористат ресурсите според докажаните неоколонијални модели. НАТО ги проширува своите пипала во индопацифичкиот регион под измислениот изговор дека развојот на ситуацијата таму може директно да влијае врз евроатлантската безбедност“, се наведува во соопштението.
