Русија денес соопшти дека продолжуваат судирите во два окрузи во подрачјето на Курск, каде што Москва тврди дека од вторникот се бори против упадите на украинските војници.
Во соопштението на руското Министерство за одбрана се вели дека неговите сили, заедно со Федералната служба за безбедност на земјата, продолжиле да отстрануваат „вооружени формации на украинските вооружени сили“ од областите Суџански и Кореневски во Курск.
И двете области се во непосредна близина на североисточниот регион Суми во Украина, каде што се изведуваат воздушни напади врз украинските резервисти, се вели во соопштението.
Се додава дека во текот на изминатите 24 часа војската на земјата, преку воздушни напади и артилериски оган, заедно со руските граничари ги спречила украинските сили да напредуваат.
Се истакнува дека Украина загубила 660 војници и 82 оклопни возила, меѓу кои осум тенка, 12 оклопни транспортери, шест пешадиски борбени возила и 55 оклопни борбени возила од почетокот на судирите во регионот.
Во вторникот Русија објави дека украински војници, вклучително и тенкови и оклопни борбени возила, ги нападнале нејзините воени позиции во близина на две погранични населби во руската област Курск.
Оттогаш Москва извести дека одбива упади на украинските сили во пограничниот регион, како и дека се спротивставува на воздушните напади врз Курск и околните региони.
Рускиот претседател Владимир Путин вчера го обвини Киев за „провокација од големи размери“ и „неселективно пукање“, а началникот на Генералштабот, Валериј Герасимов, тврдеше дека околу 1.000 украински војници ја преминале границата во областа Курск.
Земјата, исто така, соопшти дека ја зајакнала безбедноста во нуклеарната централа во Курск, околу 40 километри западно од административната престолнина на регионот и околу 60 километри северно од градот Суџа, кој се наоѓа на околу 10 километри од украинската граница.
Гувернерот на Курск, Алексеј Смирнов, подоцна во текот на денот објави дека во регионот е воведена вонредна состојба.
Советникот на украинскиот претседател, Михаило Подољак, преку платформата X истакна дека „секоја ескалација, гранатирање, воени дејства, присилна евакуација и уништување“, вклучително и оние во рамките на Русија, се предизвикани од „недвосмислената агресија на земјата“.
Во меѓувреме и украинскиот пратеник Олекси Хончаренко на Телеграм ја коментираше ситуацијата во Курск, велејќи дека „странска армија“ спроведува „воена операција“ во Русија првпат по Втората светска војна.
Еден ден подоцна Хончаренко истакна дека украинските трупи ја презеле контролата врз центарот за пренос на гас Суџа, единствената маршрута за пренос на руски природен гас во Европа, што претставува првпат украински функционер да потврди упад на руска територија.
Независната проверка на тврдењата на Русија и Украина е тешка поради тековната војна.
