Русија испорача 200.000 тони жито во шест африкански земји, бесплатно, како хуманитарна помош, соопшти денес рускиот министер за земјоделство Дмитриј Патрушев.
Говорејќи на состанокот со претседателот Владимир Путин во Москва, Патрушев истакнал дека последниот брод бил истоварен во Сомалија на 17 февруари.
„Како резултат на тоа, 200.000 тони жито се пратени на африканскиот континент речиси истовремено. Според тоа, Мали, Буркина Фасо, Зимбабве и Еритреја беа снабдени со по 25.000 тони, а ние, исто така, испорачавме 50.000 тони во Сомалија и исто толку во Централноафриканска Република“, рече тој.
Патрушев нагласи дека „вака голема хуманитарна акција првпат е спроведена од Русија“.
Министерот соопшти дека во 2023 година Русија продала 66 милиони тони житни култури во странство за 16,5 милијарди долари, што е „апсолутен рекорд за Русија“.
„Во трговијата со пченица и понатаму го држиме првото место во светот. Русија е главен снабдувач на оваа култура за земји како Египет, Туркије, Саудиска Арабија, Индија и Кина“, додаде тој.
И покрај намалувањето на цените на пченицата на светско ниво, приходите на Русија од трговијата со жито минатата година се зголемија за 1,5 милијарди долари, нагласи рускиот министер.
Русија им продава храна на 150 држави, а најголемиот дел, околу 90 отсто, оди во „пријателски“ земји, рече Патрушев.
„Очекуваме дека во 2024 година извозот нема да биде помал од 2023 година. Реков дека цените на земјоделските производи се многу намалени. Вклучително и житото, оваа година планираме да испорачаме до 70 милиони тони во странство“, рече тој.
Минатата година Русија одби да ја продолжи Иницијативата од 2020 година за извоз на жито преку Црно Море, наведувајќи како причина тоа што спротивно на целите на програмата најголем дел од извозот на храна оди во богатите, развиени земји наместо во сиромашните и дека рускиот дел од договорот не се спроведува.
Москва, исто така, вети дека на свој трошок ќе испорача жито до најсиромашните земји.
