Украина мора да биде „блиску вклучена во сè што се случува во врска со Украина“, изјави Марк Руте генералниот секретар на НАТО.
„Клучно е - зборуваме за Украина - да е блиску вклучена во сè што се случува во врска со Украина“, изјави Руте пред состанокот на министрите за одбрана во Брисел.
Шефот на НАТО истакна дека исходот од можните разговори мора да биде „издржлив“ за да се спречи идна агресија.
„Министрите ќе разговараат и за воените трошоци“, рече Руте и додаде: „Не произведуваме доволно и ова е колективен проблем.“
„Мора да трошиме повеќе, не само затоа што САД го очекуваат тоа туку и ние мора да трошиме повеќе затоа што знаеме дека се зголемува заканата што доаѓа од Русија и од другите противници“, нагласи Руте.
Украинскиот претседател Владимир Зеленски вчера изјави дека имал „значаен разговор“ со американскиот претседател Доналд Трамп и „разговарал за можностите за постигнување мир“.
Трамп разговараше и со својот руски колега Владимир Путин, кој го поддржа неговиот став дека е дојдено време тие да „работат заедно“.
Секретарот за одбрана на Обединетото Кралство, Џон Хили, од своја страна, рече: „Ги видовме повиците од претседателот Трамп во текот на ноќта и сите сакаме да видиме траен мир и да нема враќање на конфликтот и агресијата.“
Тој истакна дека „Русија останува закана надвор од Украина“ и дека не може да се водат мировни преговори „за Украина без Украина, а гласот на Украина мора да биде во срцето на сите разговори“.
