Шпанскиот премиер Педро Санчез повика на итен прекин на војната во Појасот Газа, нагласувајќи го решението за две држави што предвидува формирање посебна палестинска држава покрај Израел.
„Го повторуваме нашиот повик за итен прекин на војната во Газа. Меѓународната заедница и Европа не можат да останат рамнодушни на страдањата на илјадници невини луѓе, особено на жените и децата. Не можеме да живееме со смрт и уништување или да прифатиме насилство“, рече Санчез по средбата со палестинскиот претседател Махмуд Абас во Мадрид.
Шпанскиот премиер рече дека разговарале за ширењето на конфликтот во Либан, по експлозиите на уредите за безжична комуникација во вторникот и средата, во кои загинаа најмалку 37 луѓе, а илјадници беа повредени.
Либанската група Хезболах го обвини Израел дека стои зад експлозиите на направа и најави одмазда. Санчез ги повика сите инволвирани страни да избегнат понатамошна ескалација на конфликтот.
Шпанија е една од европските земји кои одлучија официјално да ја признаат државата Палестина како знак на поддршка за мировниот процес со Израел.
Санчез го повика Израел да ја прекине окупацијата на палестинските територии на Западниот Брег и да ги повлече своите војници од Појасот Газа за да го отвори патот за формирање палестинска држава.
Палестинскиот претседател Абас изрази благодарност до шпанскиот премиер за неговата непоколеблива поддршка за палестинскиот народ и повика на мировна конференција во Мадрид.
„Ние сме посветени на одржување на палестинската држава на Западниот Брег и Газа, со источен Ерусалим како главен град“, рече Абас.
Тој рече дека планира да оди во Газа со сите палестински лидери за да побара прекин на војната во палестинската енклава и ги повика западните лидери да му се придружат, вклучувајќи го и генералниот секретар на ОН.
