Украинските сили заробиле ранет севернокорејски војник, кој бил дел од трупите што Пјонгјанг ги испрати како помош за руските сили во војната со Украина.
Информацијата ја објави јужнокорејската новинска агенција Јонхап, пренесувајќи кратка изјава на Националната разузнавачка служба на земјата, во која се наведува дека севернокоресјкиот војник бил уапсен од украинските сили за специјални операции.
Станува збор за прв ваков случај, откако Северна Кореја испрати дел од своите трупи за да ѝ помогнат на Русија во нејзините воени напори.
„Преку брзо споделување информации со разузнавачката агенција на сојузничката земја, потврдено е дека е заробен еден ранет севернокорејски војник“, се вели во соопштението на јужнокорејската Национална разузнавачка служба.
Ова е прва официјална потврда за заробување на севернокорејски борец во конфликтот.
Извештајот доаѓа еден ден откако украинскиот медиум Милитарњи објави дека украинските сили за специјални операции заробиле војник за кој се верува дека е севернокорејски борец во рускиот регион Курск.
Дополнително на платформата Телеграм беше објавена фотографија од заробен војник, со наводи дека е ранет. Сепак, веродостојноста на фотографијата засега не е независно потврдена.
Исто така, како што пренесуваат медиумите, не е се познати ниту детали за статусот и состојбата на заробениот војник.
Информации велат дека тој бил заробен во регинот Курск чиј дел се најде под украинска окупација по ненадејаната офанзива што пред неколку месеци ја спроведоа нејзините сили.
Во регинот во тек се борби меѓу украинските и руските сили кои се обидуваат да го вратот регионот под целосна контрола.
Началникот на Здружениот генералштаб на Јужна Кореја во понеделникот соопшти дека над 1.000 севернокорејски војници загинале и дека Пјонгјанг се подготвува за „ротација или дополнително распоредување војници“.
Во меѓувреме, односно минатиот месец, Пјонгјанг го ратификуваше договорот за сеопфатно стратешко партнерство со Русија, што го отвори патот за испраќање на севернокорејски војници да се борат на руска територија против Украина.
Северна Кореја, исто така, ја снабдува Русија со напредно вооружување, меѓу другото и со ракетни лансери од 240 мм и самоодна артилерија од 170 мм.
Војската на Сеул смета дека Северна Кореја ја користи војната за да ги модернизира своите конвенционални воени способности преку искуство на бојното поле.
Во меѓувреме, севернокорејските државни медиуми го истакнаа зајакнувањето на односите меѓу Пјонгјанг и Москва, а рускиот претседател Владимир Путин го пофали нивниот одбранбен пакт како историски документ и ги истакна подобрените билатерални односи по разговорите со севернокорејскиот лидер Ким Џонг Ун во јуни.
