Германскиот канцелар Олаф Шолц денеска изјави дека е подготвен со рускиот претседател Владимир Путин да разговара за мирно решавање на ситуацијата во Украина.
Говорејќи во Бундестагот, канцеларот се заложи за одржување на мировна конференција за Украина со учество на Русија.
„Во овој поглед, мислам дека сме во право кога велиме дека ќе разговараме со рускиот претседател“, нагласи Шолц.
Тој посочи дека постојат јасни принципи во мировните напори, особено дека сите можни одлуки не можат да се носат „зад грб на Украина и без координација со партнерите“, пренесува ТАСС.
Руската агенција наведува дека кабинетот на Шолц во овој момент не сака да го коментира можниот телефонски разговор меѓу Путин и Шолц.
Државниот секретар Штефен Хебстрајт претходно нагласи дека германскиот канцелар е секогаш подготвен да оствари контакт со рускиот претседател „ако е соодветно“, но дека во моментов нема такви планови.
Весникот „Ди Цајт“ на 1 октомври објави, повикувајќи се на официјални извори, дека Шолц планира да оствари контакт со Путин пред самитот на Г-20 што во ноември ќе се одржи во Бразил.
Доколку дојде до таков разговор, германскиот канцелар ќе биде првиот лидер на западниот блок што ќе комуницира со Путин во изминатата година и половина.
Портпаролот на Кремљ, Дмитриј Песков, на почетокот на октомври повтори дека Путин отсекогаш бил и останува подготвен за дијалог.
Тој, сепак, потсети дека Путин и Шолц во овој момент немаат заеднички теми за разговор.
