По три години треба да биде јасно дека санкциите воведени кон Русија пропаднаа, изјави унгарскиот министер за надворешни работи Петер Сијарто.
„Овие мерки и нанесоа огромна штета на Европа, вклучително и нашата земја. Унгарската економија претрпе штета од 19 милијарди евра“, рече денеска шефот на унгарската дипломатија пред да замине на состанокот на министрите за надворешни работи на земјите-членки на Европската унија во Брисел.
Во исто време, рече Сијарто, Украина постојано презема чекори кои ја загрозуваат енергетската безбедност на Унгарија и на Централна Европа.
„Ова не може да продолжи“, рече тој.
Сијарто посочи дека денеска на Советот на министри за надворешни работи на ЕУ со нивното гласање ќе се одлучи дали Европската комисија ќе даде гаранција за мерките во случај на загрозување на енергетската безбедност на земјите-членки на ЕУ.
Во петокот Унгарија повторно го блокираше обновувањето на санкциите на Европската унија против Русија, барајќи во последен момент Украина повторно да ги отвори гасоводите и да дозволи проток на руски гас во Европа.
„Сега кога на дневен ред е прашањето за продолжување на санкциите, ја повлеков рачната сопирачка и ги повикав европските лидери да разберат дека тоа не е така“, изјави претходно премиерот Виктор Орбан.
Тој рече дека Унгарија не може да поднесе толку голем товар на санкции.
Коментарите на Орбан дојдоа непосредно пред европските претставници да се состанат во Брисел, каде што се обидоа повторно да одобрат сеопфатен пакет санкции на ЕУ против Русија, кои вклучуваат сериозни трговски ограничувања и замрзнување на речиси 200 милијарди евра руски државен имот. Сите земји-членки на ЕУ мора едногласно да ги продолжуваат овие санкции на секои шест месеци.
