Во Скопје се одржа Меѓународен симпозиум на Медресата „Меддах“ на 100-годишнината од нејзиното основање.
Симпозиумот е организиран од страна на Фондацијата за балкански студии (БСФ) со седиште во Скопје, и Фондацијата за истражување на исламските науки, со поддршка на Меѓународниот балкански универзитет (ИБУ), Скопското муфтиство, Универзитетот „29 Мајис“ од Туркије и Високиот исламски институт во Софија.
На отворањето на симпозиумот учествуваа министерот за образование на Северна Македонија, Јетон Шаќири, министерот за здравство на Северна Македонија, Фатмир Меџити, претставници на турските и локалните организации и институции во земјата, професори, студенти и голем број поканети гости.
Министерот Шаќири нагласи дека медресите во свое време биле „храмови на науката“, како што се универзитетите во денешното време.
„Медресите ја играле улогата на образовниот процес, децата ги научиле да читаат и пишуваат, и обезбедувале воннаставни активности, како и верска поука, читање Куран и верски предавања“, рече Шаќири.
Зборувајќи за важноста на Медресата „Меддах“, Шаќири рече: „Бидејќи е прва во нашата земја, претставува основа за ширење на други медреси, одиграла важна улога во различни историски периоди во развојот и образованието на генерациите од тоа време.“
Министерот Меџити истакна дека овој симпозиум има интелектуална, но и духовна природа.
„Во фокусот (на симпозиумот) е Медресата Меддах, која е извор на знаење, култура, вера и пред сѐ пример за вредностите на мирот и толеранцијата, кои се двата главни столба на исламот“, додаде Меџити.
Ректорот на ИБУ, проф. д-р Лутфи Сунар, рече дека се среќни што се домаќини на ваков важен настан, и потоа даде информации за ИБУ.
Претседателот на Управниот одбор на БСФ, Севба Абдула, укажа на важноста на оваа медреса, а Медресата „Меддах“ ја опиша како една од истакнатите манифестации во поновата историја, социјални сеќавања, религиозни мисли и животи, и нивниот идентитет.
На настанот беше прикажана и видеопораката на претседателот на Управата за верски прашања на Туркије, Али Ербаш.
Меѓу другото, на овој настан свои обраќања имаа и муфтијата на грчкиот град Ксанти, Мустафа Трампа; претседателот на Високиот исламски совет на Бугарија, Ведат Ахмет; поглаварот на Исламската верска заедница на Северна Македонија, Шаќир Фетаху; скопскиот муфтија Ќенан Исмаили; потпретседателот на Фондацијата за истражување на исламските науки, Бедретин Четинер, проректорот на Универзитетот „29 Мајис“, Илјас Челеби; и претседателот на Институтот за наука при Универзитетот „Меденијет“ во Истанбул, Ихсан Фазлиоглу.
По обраќањата, скопските музички уметници Бурхан Шабан и Месут Куртиш одржаа концерт.
Во рамки на симпозиумот, што ќе заврши утре, учесниците ќе ги презентираат своите трудови.
Медресата „Меддах“
Не постојат конкретни информации околу тоа кога била изградена Медресата „Меддах“, која е изградена од страна на Меддах Баба, кој бил професор на Јигит-паша, командант кој го ослободил Скопје. Но, се претпоставува дека оваа медреса била изградена во 15 век.
Медресата функционирала до Првата светска војна, а во 1923 година повторно била отворена од страна на Атаулах Куртиш. Оваа медреса продолжила со својата работа до Втората светска војна, а била затворена во периодот на Југославија.
