Сирискиот претседател Башар ал Асад се согласи да отвори два нови премини од Туркије кон северозападниот дел на Сирија што е под контрола на опозицијата за да биде доставена помошта и опремата која им е неопходна на милиони жртви од земјотресот.
Генералниот секретар на ОН, Антонио Гутереш, во вторникот го поздрави договорот на Башар ал Асад за отворање на премините кај Баб ал Салам и Ал Раи за период од три месеци. Во моментов, на ОН им е дозволено да достават помош во северозападната област Идлиб само преку преминот во Баб ал Хава. Тоа се случи на инсистирање на сирискиот сојузник Русија.
Најавата за отворање на граничните премини следува по состанокот во Дамаск меѓу Асад и шефот за хуманитарна помош на ОН Мартин Грифитс.
Шефот на главната спасувачка група, управувана од сириската опозиција, ја осуди одлуката на ОН која му даде право на Асад да ги санкционира нивните испораки на помош.
„Ова е шокантно и ние сме во загуба“, изјави Раед ал Салех, шеф на групата Бели шлемови, за Ројтерс.
Залихи за спасување животи
Генералниот секретар на Обединетите Нации смета дека со зголемувањето на бројот на загинати испорачувањето на храна, лекови, засолништа, зимски резерви и други материјали за спасување е од голема итност.
„Отворањето на овие премини - заедно со олеснувањето на хуманитарниот пристап, забрзувањето на одобрувањата за визите и олеснувањето на патувањето меѓу центрите ќе овозможи поголема помош да оди, побрзо“, рече шефот на ОН.
Бразил и Швајцарија, кои ги надгледуваат сириските прекугранични прашања во Советот, побараа брза имплементација на договорот за отворање на двата нови премини. Позитивни коментари дојдоа и од САД.
„Секако се надеваме дека Асад е сериозен во врска со ова. Тоа би било добра работа за сирискиот народ рече портпаролот на американскиот Стејт департмент Нед Прајс.
