Украина остварува значаен напредок во својата контраофанзива, но западните сојузници не треба да ја потценуваат Русија, предупреди денеска челникот на НАТО, Јенс Столтенберг.
„Благодарение на херојскиот отпор на украинскиот народ и невидената поддршка од сојузниците во НАТО, Украина постигна значителни придобивки“, рече Столтенберг во својот говор на Конференцијата за безбедност во Берлин, Германија.
„Но не треба да ја потценуваме Русија. Руските проектили и беспилотни летала продолжуваат да паѓаат врз украинските градови, цивилите и критичната инфраструктура, предизвикувајќи огромно човечко страдање, како што доаѓа зимата“, додаде тој.
Столтенберг нагласи дека сојузниците на НАТО ќе продолжат да обезбедуваат воена поддршка за Украина, доставувајќи напредно оружје и системи за противвоздушна одбрана.
„Ја поздравувам силната поддршка на Германија за Украина, со значителна финансиска, хуманитарна и воена помош“, рече тој.
„Ја гледаме разликата како резултат на тоа секој ден на бојното поле. И важно е дополнително да ја засилиме и одржиме нашата поддршка“, нагласи тој.
Столтенберг, исто така, ја поздрави одлуката на Германија значително да ги зголеми трошоците за одбрана, со инвестиции во нови борбени авиони, хеликоптери, бродови и подморници.
Тој рече дека Германските вооружени сили, Бундесверот, играат клучна улога во плановите на НАТО за одвраќање и одбрана.
„Потребен ни е силен и подготвен Бундесвер со врвни способности во сите домени. Ни треба силна и робусна одбранбена индустрија која може да ги исполни барањата врз основа на јасни и одржливи сигнали за побарувачката“, рече тој.
„Ова е важно за безбедноста на Германија. Тоа е важно и за безбедноста на Европа. И тоа е важно и за глобалната безбедност“, додаде тој.
