Глобалните воени трошоци минатата 2023 година се зголемија за 6,8 отсто на историско високо ниво од 2,44 билиони долари, во однос на 2022 година, објави денес Стокхолмскиот меѓународен институт за мировни истражувања (СИПРИ).
Ова е најстрмното годишно зголемување од 2009 година, истакна Институтот, додавајќи дека тоа е деветто последователно покачување.
Најголеми 10 потрошувачи беа САД, Кина, Русија, Индија, Саудиска Арабија, Велика Британија, Германија, Украина, Франција и Јапонија. Трошоците на сите 10 земји покажаа зголемување во 2023 година.
САД потрошиле 2,3% повеќе за војската, вкупно 916 милијарди долари во 2023 година, потоа Кина 296 милијарди долари, што е зголемување за 6%, и Русија 109 милијарди долари, зголемување за 24%.
Воените трошоци на Украина во 2023 година изнесувале 59% од износот на руските воени трошоци. Украина, исто така, доби најмалку 35 милијарди долари воена помош во текот на 2023 година, вклучително и 25,4 милијарди долари од САД.
Минатата година 31 земја членка на НАТО потрошиле 1,34 билиони долари за војската, што е еднакво на 55% од светските воени трошоци.
САД имаат 68% од вкупните воени трошоци на НАТО во 2023 година, но повеќето европски земји членки на НАТО, исто така, ги зголемија своите воени трошоци.
Прогнозираните воени трошоци на Блискиот Исток минатата година се зголемија за 9% на 200 милијарди долари, што претставува највисок регистриран годишен пораст во изминатата деценија.
Воените трошоци на Израел - втори по големина во регионот по Саудиска Арабија - се зголемија за 24% и достигнаа 27,5 милијарди долари во 2023 година.
Воените трошоци на Туркије се зголемија за 37% на 15,8 милијарди долари во 2023 година во однос на претходната.
