Унгарскиот министер за надворешни работи и трговија, Петер Сијарто, денеска изјави дека Европската унија „поставила светски рекорд во лицемерие“ во однос на Грузија, но дека Унгарија и Словачка ставиле вето на предложените санкции против одредени шефови на органите за спроведување на законот во таа земја.
На прес-конференција во Брисел, по состанокот на Советот за надворешни работи, Сијарто рече дека ЕУ „ја има Грузија на нишан“ бидејќи на изборите победи промировната, патриотска, конзервативна партија Грузиски сон, а не либерални сили.
Како што се наведува во соопштението на министерството, Сијарто го отфрли „бруталниот политички напад“ на ЕУ, велејќи дека партијата Грузиски сон владеела 12 години, „за кои просечните приходи се тројно зголемени, а БДП и обемот на странски инвестиции двојно се зголемиле“.
Тој посочи дека владејачката партија во Грузија постигнала добри резултати на изборите и дека ја заслужила довербата на гласачите.
„Никој во Брисел нема право да ја доведува во прашање волјата на грузискиот народ“, рече Сијарто.
Унгарскиот министер рече дека извештаите за полициска бруталност на демонстрациите во Тбилиси се „еднострани“ и дека меѓу демонстрантите има „насилни елементи“.
Тој рече дека ЕУ „не може да воведе санкции за земјата бидејќи одлучиле да ги одложат пристапните преговори до 2028 година“.
Во врска со ситуацијата во Сирија, Сијарто рече дека не смее да се дозволи земјата да стане плодна почва за тероризам или екстремистички идеологии и дека мора да се спречат миграциските бранови во правец на Европа, како и дека мора да се запре прогонот на христијаните.
„Унгарија продолжува да обезбедува помош за христијанските заедници за да можат да останат во својата татковина и да ги зачуваат своите права... Досега обезбедивме хуманитарна поддршка во вредност од околу 30 милиони евра за сириските заедници и ќе продолжиме да го правиме тоа“, рече Сијарто.
