Јужна Кореја ја разгледува можноста за поголема поддршка за Украина како одговор на севернокорејското распоредување трупи во Русија за поддршка на тековната војна на Москва, изјави денес јужнокорејскиот претседател Јун Сук-Јол.
Јун за шпанската новинска агенција ЕФЕ рече дека Пјонгјанг, исто така, обезбедил оружје за Москва.
„Доколку и двете страни не ја прекинат својата опасна воена авантура, ние сме подготвени да спроведеме соодветни ефективни мерки, вклучително и зајакнување на поддршката за Украина, во соработка со нашите сојузници и истомисленици“, рече Јун.
Минатиот месец Јун рече дека неговата земја би можела да размисли за обезбедување оружје за Украина „во зависност од степенот на воената соработка меѓу Русија и Северна Кореја“.
Во средата јужнокорејската националната разузнавачка служба, тврдеше дека севернокорејските војници се наоѓаат во регионот на фронтот на Курск, Русија, за да се борат со украинските сили.
Украински официјален претставник, исто така, во вторникот тврдеше дека 50.000 руски и севернокорејски војници биле распоредени во Курск за да се борат против украинските сили, но Пјонгјанг не го потврди тоа.
