Германија се свртува кон јагленот како замена за рускиот гас     Фото: Ројтерс

Германија ќе даде приоритет на електраните на јаглен и ќе го зголеми природниот гас во складиштето за да ја намали потрошувачката на природен гас. Ова се дел од новите мерки што ги соопшти вчера министерот за економија и клима, Роберт Хабек.

„Ние ќе ја намалиме потрошувачката на гас во електроенергетскиот сектор и индустријата и ќе поттикнеме полнење на складиштата“, рече Хабек.

Европа бара начини како да ја намали зависноста од природен гас од Русија, која или го намалува или во некои случаи целосно го прекинува гасот за земјите од ЕУ.

Русија, досега, го прекина снабдувањето со гас за Полска, Бугарија, Данска, Финска и Холандија.

Бидејќи руските испораки стануваат несигурни, Германија вели дека ќе прибегне кон користење повеќе јаглен во електроенергетскиот сектор.

„Тоа значи, да бидам искрен, повеќе електрани на јаглен за преоден период. Тоа е горчливо, но речиси неопходно во оваа ситуација за намалување на потрошувачката на гас“, рече Хабек.

Германската Влада планира да ја ограничи потрошувачката на домаќинствата и да спроведе механизам за поттикнување помала употреба на природниот гас во индустрискиот сектор.

Како дел од новите мерки, Германија има цел да отвори дополнителна кредитна линија од 15 милијарди евра од Германската развојна банка (KfW) за компанијата „Trading Hub Europe“, одговорна за пазарот на природен гас во земјата, за да избегне недостиг на природен гас во зима.

Додека нивоата на складиран природен гас во моментов се 57 проценти, Владата има за цел да ги зголеми на нивоа од 90 проценти во ноември.

Рускиот енергетски гигант Гаспром објави дека снабдувањето со гас преку гасоводот Северен тек може да падне на 67 милиони кубни метри на ден од 16 јуни, што е намалување од вообичаеното ниво од 167 милиони кубни метри.

Во меѓувреме, Владата на Австрија се согласи со Вербунд да ја пренамени електраната на гас, што моментално не работи, за производство на електрична енергија од јаглен.

AA
Популарни