Кинеската влада во петокот објави дека поднела жалба до Светската трговска организација (СТО) заради дополнителните царини од ЕУ за увоз на кинески електрични автомобили.
На почетокот на јули, ЕУ воведе дополнителни привремени царини за увоз на електрични автомобили со батерии произведени во Кина, кои се движат од 17,4 отсто до 37,8 отсто, поради „нефер“ субвенции за производителите.
Тие потоа додадоа дека контактирале со кинеските власти за да ги разгледаат можните решенија, во согласност со прописите на СТО.
Во петокот, кинеското Министерство за трговија истакна дека одлуката на ЕУ за тарифите не е ниту фактички ниту законски заснована.
Со овие царини, Брисел ги прекршува прописите на СТО и ја поткопува глобалната соработка во борбата против климатските промени, нагласија тие.
„Пекинг ја повикува ЕУ веднаш да ја повлече одлуката и да работи со Кина за да создаде услови за економска и трговска соработка и за стабилност на синџирите на снабдување на индустријата за електрични автомобили“, се вели во соопштението на портпаролот на Министерството за трговија.
Во јуни, кинеските производители на автомобили го повикаа Пекинг да одговори со зголемување на тарифите за увоз на автомобили на бензин од ЕУ, објави кинескиот весник Глобал тајмс.
Решавањето на споровите пред СТО често трае со години.
Учесниците можат да поднесат жалба на одлуката, но механизмот за жалба не функционира бидејќи САД го блокираат назначувањето на нови експерти како дел од кампањата што треба да донесе реформи, забележува новинската агенција ДПА.
Одлуката на ЕУ следеше по истрагата, која започна минатата година, дека кинеските електрични возила со батерии (БЕВ) имаат корист од „неправедните субвенции“, што резултира со конкурентен јаз.
Првата привремена одлука ги одредува поединечните давачки за кинеските компании БИД (BYD) на 17,4%, Гили (Geely) на 20%, и САИК (SAIC) на 38,1%.
Останатите кинески производители кои не биле опфатени во истрагата на комисијата ќе подлежат на царинска стапка од 21%, додека сите други производители кои не соработувале во истрагата ќе подлежат на резидуална царина од 38,1%.
Кинезите минатата година продадоа ЕВ во ЕУ во вредност од 10 милијарди евра и го зголемија својот пазарен удел на 8 отсто. Автомобилите Тесла, исто така, се увезени во ЕУ од Кина.
