Јули 2024 година беше вториот најтопол јули и вториот најтопол месец во историјата, објави во четвртокот Службата за климатски промени на Европската унија Коперник.
Во јули 2024 година, просечната глобална температура беше 16,91 Целзиусови степени, 0,04 степени пониска од просечната температура во јули 2023 година, моментално најтоплиот месец досега.
До јуни, просечните месечни температури соборија рекорди за секој месец од мај 2023 година.
„Серијата рекордни месеци е прекината, но само за малку“, изјави заменик-директорката на службата за климатски промени Коперник, Саманта Бурџис.
„Целокупниот контекст не е променет, нашата клима продолжува да се загрева. Разорните ефекти од климатските промени започнаа многу пред 2023 година и ќе продолжат додека глобалните емисии на стакленички гасови не достигнат нето нула“, додаде таа.
За периодот од август 2023 година до јули 2024 година, просечната глобална температура била 1,64 степени Целзиусови над просекот од прединдустрискиот период, покажуваат податоците на Коперник.
Земјата ги доживеа двата најтопли дена досега во јули - со дневни глобални просечни температури кои достигнаа 17,16 степени Целзиусови и 17,15 Целзиусови степени на 22 и 23 јули, соодветно.
Просечната јулска температура во Европа го надмина просекот за месецот од 1991 до 2020 година за 1,49 степени Целзиусови, што го прави вториот најтопол јули досега во Европа.
Според извештајот, температурите биле претежно надпросечни над јужна и источна Европа, но блиску до или под просекот над северозападна Европа.
Климатската служба на Европската унија Коперник редовно објавува податоци за температурата на површината на Земјата, морската ледена покривка и врнежите.
Наодите се засноваат на компјутерски генерирани анализи кои вклучуваат милијарди мерења од сателити, бродови, авиони и метеоролошки станици ширум светот.
