Израелските сили ослободија 82-годишна жена од Газа која боледува од Алцхајмерова болест, откако ја приведоа затоа што се сметаше за „незаконски борец“, објави во четвртокот израелскиот дневен весник Хаарец.
Фахамија Калиди беше приведена од израелските сили на почетокот на декември во училиште во Газа, каде што побарала засолниште откако се евакуирала од својот дом во населбата Зејтун за време на израелското гранатирање.
Калиди беше задржана во затворот Дејмон во северен Израел и беше ослободенa на 19 јануари заедно со уште пет жени кои беа прогласени за „незаконски борци“, се вели во извештајот.
Барањето за средба меѓу Калиди и адвокат првично беше одбиено од затворските власти. Меѓутоа, по подоцнежните апели, постарата жена била пуштена на слобода.
Беше забележано дека човекот кој се грижи за Калиди, чии деца живеат во странство, исто така е приведен и моментално се наоѓа во израелски затвор.
Според изјавата на друга жена од Газа, ослободена од истиот затвор, Калиди, која има тешкотии при одење и користи инвалидска количка, повремено била носена во затворската клиника со лисици.
Калиди не беше единствената постара и болна жена во затворот, според еден од ослободените затвореници.
Шестте жени од Газа заедно со 18 машки затвореници биле однесени во близина на граничниот премин Керем Шалом во Газа, а кога почнале да си одат, израелските војници наводно отвориле оган врз нив.
Калиди беше испратена во болница во градот Рафах во јужна Газа, од шатор поставен од агенцијата на ОН за палестински бегалци (УНРВА), каде што се примаат ослободените палестински затвореници.
Таа наводно таму почнала да добива лекарска помош.
