Албанија, Обединетите Арапски Емирати и Италија потпишаа трипартитен договор за стратешко партнерство за обновлива енергија и зајакнување на енергетската инфраструктура.
Италијансаката премиерка Џорџија Мелони, во присуство на претседателот на ОАЕ Мохамед бин Зајед ал Нахјан и албанскиот премиер Еди Рама, на церемонија во Абу Даби главниот град на Емиратите, потпишаа трипартитна рамка за стратешко партнерство за прекугранична соработка за зелена енергија, се вели во соопштението.
Пактот го потпишаа министерот за индустрија и напредна технологија на ОАЕ, Султан бин Ахмед ал Џабер, италијанскиот министер за животна средина и енергетска безбедност Жилберто Пичето Фратин и заменик-министерот за инфраструктура и енергија на Албанија.
Стратешкото партнерство има за цел да ја зајакне соработката меѓу трите земји во областа на обновливите извори на енергија и енергетската инфраструктура, вклучително и спроведувањето на проекти за обновливи извори на енергија во обем во Албанија и воспоставување на далноводно поврзување со Италија.
Трилатералното стратешко партнерство, објавено за време на Дијалогот на високо ниво за поврзување со мрежата како дел од Неделата на одржливост во Абу Даби, наводно се смета за важен чекор кон подобрување на енергетската безбедност во медитеранскиот регион, промовирање на одржлив развој и забрзување на транзицијата кон чиста енергија.
Беше наведено дека партнерството има за цел да развие проекти за соларни, ветерни и хибридни решенија, како и потенцијални технологии за складирање батерии, при што значителен дел од енергијата ќе се пренесува во Италија.
Дополнително, во соопштението се додава дека пактот вклучува имплементација на прекугранична линија за пренос на електрична енергија меѓу Албанија и Италија.
Говорејќи за време на Неделата на одржливост во Абу Даби, Мелони изрази гордост за трипартитниот договор за производство и пренос на обновлива енергија.
„Сепак, ако сакаме да ја направиме енергетската транзиција конкретна и одржлива, мора да обезбедиме таа да биде надополнета со соодветна инфраструктура. И јас сум сигурна дека развојот на меѓусебните врски може да биде основата на новата енергетска дипломатија за да се умножат можностите за соработка меѓу нас и да се генерираат заеднички придобивки за сите“, рече таа.
