Централната банка на Косово соопшти дека презела дополнителни мерки како дел од своите активности за олеснување на спроведувањето на регулативата за готовинското работење во евра, кои ќе бидат преземени најдоцна во рок од три месеци.
Регулативата на ЦБК, која стапи во сила на 1 февруари, се однесува на готовински платежни трансакции само во валутата евро, што го исклучува српскиот динар, кој е во употреба од 1999 година во областите каде живее српско население.
По бројните реакции од меѓународната заедница и од српската заедница во Косово, Централната банка соопшти дека како дел од своите активности за олеснување на спроведувањето на регулативата за готовинско работење, ја информира јавноста дека во соработка со банките и другите финансиски институции, веќе презела и презема дополнителни мерки во најкраток можен рок, но најдоцна во рок од три месеци.
Меѓу мерките се и функционализација на бесплатна телефонска линија, е-пошта за поплаки, како и наменски „вибер“ број.
„Олеснување на условите за отворање банкарска сметка, во конкретни случаи во општините со српско мнозинство, особено во четирите северни општини, со можност за комплетирање на документи (доказ за адреса) по отворањето и активирањето на сметката“, наведуваат од ЦБК.
ЦБК ги укинува надоместоците за плаќања од небанкарски финансиски институции, со акцент на менувачниците, за да поттикне отворање канцеларии во косовските општини со мнозинство српски граѓани, со акцент на северните општини.
Меѓу мерките се и проширувањето на присуството на банкарски и небанкарски институции за покривање на областа на северот на Косово, олеснување на обезбедувањето мобилни банкарски услуги од страна на комерцијалните банки на северот на Косово, поставување на неколку банкомати, како и други уреди за електронско плаќање или финансиско самопослужување, и олеснување на процесот за претворање на динари во евра, од лиценцирани институции и менувачници.
Следно, продолжување на зголемените промотивни активности, зголемување на пристапот до финансии, разгледување на условите за конверзија со повластен девизен курс при примање средства и подигнување од банкомати со меѓународни картички издадени надвор од Косово.
Како што е наведено, овие акции се преземаат покрај конструктивниот ангажман, за да се олесни механизмот на трансфер на средства на најефикасен начин од Србија во Косово, преку банкарски сметки.
Претходно вчера во Северна Митровица се одржа мирен протест поради укинувањето на динарот во Косово во организација на Здружението на обединети пензионери и поддржан од Српска листа.
Од протестот беше побарано од меѓународната заедница да ја укине одлуката за забрана за користење на динарот на Косово, а беше упатен апел да се овозможи продолжување на исплатата на платите, пензиите и социјалните надоместоци од Србија, како и досега.
