Министерството за внатрешни работи ѝ поднесе кривична пријава на поранешната министерка за култура, Бисера Костадиновска- Стојчевска за злоупотреба на службена положба и овластувањето во врска со реконструкцијата на Универзалната сала во Скопје.
Сектор за економски криминал и корупција во координација, со Одделот за сузбивање организиран и сериозен криминал, Сектор за криминалистички истраги, Единица за финансиски криминал до ОЈО Скопје поднесе кривична пријава против поранешната министерка за сторено кривично дело злоупотреба на службената положба и овластувањето од член 353 став 4 во врска со став 1 од КЗ.
Според МВР, осомничената во својство на службено лице на 19.2.2024 ја злоупотребила својата службена положба и овластувањето со неизвршување на својата службена должност.
Таа не ја испочитувала одлуката од Советот на Град Скопје и заклучокот од владата на РСМ за пренесување на правото за реконструкција, доградба и надградба на постојниот објект Универзална сала во Скопје, како и по склучен договор за регулирање на меѓусебните права и обврски помеѓу Град Скопје како сопственик и Министерството за култура како нов инвеститор/
„И покрај тоа што Министерството било задолжено да ги спроведе неопходните постапки за доделување сите потребни договори за целосно и комплетно завршување на реконструкцијата на објектот, иако во согласност со одредбите на Законот за јавните набавки била должна да спроведе нова постапка за јавна набавка за избор на најповолен изведувач на работите за довршување на реконструкцијата, Б.К.С. во име на Министерството за култура како наводен нарачател со правно лице од Скопје како изведувач, склучила договор за преземање и отстапување права и обврски од договор за јавна набавка на работи во вредност од 115.173.789 денари, во согласност со кој Министерството наводно ги презело истите права, обврски и вредност од претходно склучениот договор помеѓу Град Скопје и истото тоа правно лице, иако знаела и била свесна дека претходно склучениот договор за јавна набавка помеѓу Град Скопје како договорен орган и правното лице како носител на набавката за реконструкција на објектот на 4.9.2023 година бил со истечен рок за изведба на работите“, велат од МВР.
Според полицијата, за истото од страна на договорниот орган Град Скопје на електронскиот систем за јавни набавки- ЕСЈН на 18.9.2023 година било прикачено и известување за реализиран договор,предметот кај договорниот орган Град Скопје бил архивиран како завршен и како таков договорот не претставува правен валиден акт, кој може да биде преземен, а врз основа на кој нов договор по доставени две привремени ситуации од страна на изведувачот за изведени работи, таа на фирмата од Скопје ѝ исплатила вкупен износ од 27.197.845 денари, со што му овозможила ѝ како изведувач на работите да стекне противправна имотна корист во наведениот износ.
