Над 650 производи од 15 декември ќе имаат намалени цени за најмалку 10 проценти, а меѓу нив ќе се најдат дел од основните прехранбени производи како што се лебот, житариците, млекото и млечните производи, месото и преработките, свежи продукти, како и пијалоци, најави денеска премиерот Христијан Мицкоски на пресконференција.
Производите во таканаречената новогодишна кошничка кои ќе поевтинат ги понудиле производителите и трговците, како резултат на анализата кои производи најчесто се купуваат за време на Нова година и другите празници.
Ова денеска со консензус го договорија владата, трговците, дистрибутерите и синдикатите и стопанските комори, информираа Мицкоски и министерот за економија Бесар Дурмиши.
Мицкоски рече дека ова е прв пат да се донесе мерка без притисок од страна на Владата, бидејќи е понудена од компаниите, дистрибутерите и трговците и е донесена со консензус на сите заинтересираните страни.
Во овој период нема да има казни бидејќи намалувањето на цените на овие производи е предлог на компаниите. Контролата ќе ја вршат граѓаните.
„Направивме нешто што можеби досега никогаш не е направено- сите заедно разговаравме извесен период и за време на тие разговори дојдовме до компромис. Сите се согласивме во периодот од 15 декември до 15 јануари цените на повеќе од 600 артикли да бидат намалени и брендирани со налепници на кои ќе пишува „Помалку трошоци, повеќе за тебе, се грижиме“, рече Мицкоски.
Во акцијата за почеток учествуваат 60 компании, но е отворена за учество и на други компании и за други производи сѐ до 15 јануари.
„Очекувам и понатаму да продолжиме заеднички да бидеме општествено одговорни за овие тешки моменти, заеднички да работиме да помогнеме на македонските граѓани, на македонската економија, стандардот на македонските граѓани и на тој начин да има повеќе за секого. А ние како Влада да се грижиме, бидејќи тоа е многу важно затоа што оваа Влада од самиот почеток, еве веќе шести месец откако е избрана има за цел да се грижи за стандардот на граѓаните и државата генерално за да се вратиме на оние победнички патеки каде што и во суштина припаѓаме. Така што еве јас тука да сумирам, очекувам успешна акција, очекувам ниски цени во очи на новогодишните празници, и очекувам среќни граѓани и полна трпеза за време на празниците кои што следат“, рече премиерот.
Мицкоски рече дека не очекува компаниите кои учествуваат во акцијата да ги зголемат цените пред почетокот на акцијата, а потоа да ги намалат за договорените 10%, но најави дека државниот пазарен инспекторат ќе ги провери сегашните цени со цените кои ќе бидат објавени за време на акцијата.
