Потпишана Декларација на Самитот ЕУ-Западен Балкан

На Самитот ЕУ-Западен Балкан во главниот град на Албанија, Тирана, потпишана е Декларација во која се истакнува дека Европската Унија (ЕУ) уште еднаш ја потврдува својата целосна и недвосмислена посветеност на перспективата за членство на Западен Балкан во Европската Унија.

Во Декларацијата, ЕУ земјите од Западен Балкан ги повикува на забрзување на пристапниот процес заснован на кредибилни реформи од страна на партнерите, фер и ригорозни услови, како и принципот на сопствените заслуги.

„ЕУ ги охрабрува земјите во регионот да постигнат брз и одржлив напредок кон целосно усогласување со заедничката надворешна и безбедносна политика на ЕУ и да дејствуваат соодветно, вклучително и во областите на рестриктивните мерки на ЕУ“, се наведува во декларацијата.

„Ескалацијата на руската агресивна војна против Украина ги става во ризик европскиот и глобалниот мир и безбедност и ја нагласува важноста на стратешкото партнерство меѓу ЕУ и регионот на Западен Балкан“, се нагласува во првата точка од заедничката декларација усвоена по самитот ЕУ-Западен Балкан во Тирана.

Меѓу другото, ЕУ го поздравува и напредокот постигнат од страна на партнерите од Западен Балкан на нивните соодветни патишта на ЕУ од Самитот ЕУ-Западен Балкан во Брдо во октомври 2021 година. „Особено, ЕУ го поздравува одржувањето на првите Меѓувладини конференции со Албанија и Северна Македонија“, стои во декларацијата.

ЕУ ја поздравува решеноста на партнерите од Западен Балкан да ги поддржуваат основните европски вредности и принципи, во согласност со меѓународното право.

„Заедно со ЕУ е јасен знак за стратешката ориентација на партнерите, сега повеќе од кога било кога Русија ја ескалира својата агресивна војна против Украина. Заедничката визија за иднината вклучува меѓусебни одговорности и заеднички вредности“, пишува во декларацијата.

Усогласување со Заедничката надворешна и безбедносна политика на ЕУ

Исто така, се наведува дека додека ЕУ ја продлабочува соработката со партнерите, ги повикува да постигнат и брз и одржлив напредок кон „целосно усогласување со Заедничката надворешна и безбедносна политика на ЕУ и да дејствуваат соодветно, вклучително и за рестриктивните мерки на ЕУ.“

„Ги поздравуваме оние партнери од Западен Балкан кои веќе ја демонстрираат својата стратешка посветеност во овој поглед со целосно усогласување ги охрабруваме оние кои не го сториле тоа да го следат примерот“, стои во декларацијата во која се потенцира дека „ЕУ останува најблискиот партнер на регионот, главен инвеститор и трговски партнер и главен донатор.“

ЕУ потсетува на важноста од продолжување на реформите, и за доброто на граѓаните и како основа за континуирана поддршка на ЕУ, особено во областа на владеењето на правото, а особено на оние реформи поврзани со независноста и функционирањето на судството и борбата против корупцијата и организираниот криминал.

ЕУ ги поддржува напорите за дијалогот Белград-Приштина

Во декларацијата од Самитот ЕУ-Западен Балкан се нагласува и важноста на напорите за дијалогот Белград-Приштина, при што се истакнува дека ова прашање е од клучно значење за стабилноста и развојот на целиот регион.

„Ние продолжуваме целосно да ги поддржуваме напорите на високиот претставник на ЕУ и специјалниот претставник на ЕУ за дијалогот Белград-Приштина и другите регионални прашања од Западен Балкан и очекуваме конкретен напредок од двете страни кон сеопфатен правно обврзувачки договор за нормализација на односите меѓу нив“, се вели во декларацијата и се нагласува:

„Ги повикуваме двете страни конструктивно да се ангажираат за решавање на сите нивни билатерални спорови и да се воздржат од еднострани и/или провокативни дејствија што би можеле да доведат до тензии и насилство и реторика што не е погодна за дијалогот.“

Во декларацијата во која се наведени 32 точки кои се однесуваат на различни полиња на соработка и заеднички сфери на интерес, меѓу кои се и поддршката од ЕУ за земјите во поглед на спроведување на реформите, финансискиот пакет за земјите од Западен Балкан за справување со енергетската криза, инвестиции, намалување на цените за роаминг меѓу ЕУ и регионот од следната година, борбата против нерегуларна миграција, борба против тероризмот и организираниот криминал, како и усогласувањето на визната политика на земјите од Западен Балкан со визната политика на ЕУ.

На Самитот ЕУ-Западен Балкан во Тирана, покрај највисоките функционери на ЕУ, на собирот учествуваа и лидери на 27 земји членки и држави од регионот.

Со Самитот претседаваше претседателот на Советот на ЕУ Шарл Мишел, а свое учество на настанот имаше и претседателката на Европската комисија Урсула фон дер Лајен.